ክወግሕ'ዩ ቀደድ ክብል ሓቂ
ክዅላዕ ከም ወርቂ
ክንርእየሉ ዕንቍ።
ኣንታ ክወግሕ 'ዩ!
ክወግሕ'ዩ ቀደድ ክብል ሓቂ
ክዅላዕ ከም ወርቂ
ክንርእየሉ ዕንቍ።
ኣንታ ክወግሕ 'ዩ!
ክገሃደልና 'ዩ
መን'ዩ ኣድጊ መን'ዩ ጠይቂ
መን'ዩ ኣብዲ መን'ዩ ጸይቂ
መን ኣማኒ መን ጠላም
መን ብርሃን መን ጸላም።
ክወግሕ 'ኮ እዩ ከም ትማሊ
ከይነብር ዶ ጸላም መታለሊ
ዘይ ከዳኽመና'ሉ ክፈላሊ
ዓሻ እንተረኸበ ዝሃደሞ ዕሊ
ንሽዓ ክጥቀም ዝብድል ብኸውሊ
ዘይወግሕ መሲሉዎ ሓሶት ዝኣራሪ።
እምበር ክወግሕ 'ዩ
ቀረባ 'ዩ ዕለቱ
ኮሜት ኣይኮነን መዋእል ዓመቱ
ኣይክነብርን'ዩ ንጹሃን ዓሚቱ።
ትማል ዶ ኣይነበረን ጸላም
ብድቕድቕ ጸላሙ ዘባህረረ ኣዳም፡
ንሱ 'ኳ ወጊሑ
ብጸሓይ ሓቂ ተገሊሁ
ርጉእ-ሓሶት ኣምኪኹ
ዓኾኳይ ዓኾዃይ ተባሂሉ
ብሰብን 'ዝግን ተባሪኹ።
ኣራዊት ታይ 'ልኩሞ ሰባት ዘይትኾኑ
ስጋ-ሰብ በሊዕኩም ህይወት ትፍትኑ
ኣብ ክንዲ ንህይወት ንሞት ትሕንሕኑ
ምእንቲ ጽሩራ ሰባት ትኹንኑ፥
ክንዲ 'ብ ልዕሊ መሬት ጎጆ ትድኩኑ
መቓብር ፍሒርኩም ጀጋኑ ትደፍኑ
ንሓጥያት ሓሪኹም ጽድቂ ትፍንፍኑ።
ኣቱም እትኣስሩ
ኣዳውኩም እሰሩ
ኣቱም እትቐትሉ
ነብስኹም ቅተሉ
ኣቱም ትዕዘቡ
ንሓቂ መስክሩ
ደም ኣይሰድድን 'ዩ ውዒሉ ሓዲሩ
ታሪኽ ኣይርስዕን 'ዩ ነዊሑ ሓጺሩ።
ኣንታ ክወግሕ 'ዩ
ክንረአአ ዓይኒ-ንዓይኒ
ክንሰማማዕ ኣፍ ንኣፍ ኣብ እዝኒ
ጠላም ምስ ኣማኒ
ነብዪ ምስ ወዲኒ፡
ክንረአአ 'ና ዓይኒ ንዓይኒ
ኣብ ጻሕ ዝበለ ጎልጎል
ሓቂ ምስ ደጕሐ ቀንዴል
ቀባሕባሕ ክኽውን 'ዩ
ፍትሒ ክደላደል።
ገለ ገጽ ክጽምሉ
ቀንጥዩዎ ግብሩ
ብነብሰ ኩነነ
ንነብሱ ኣማሪሩ
ፊቱ መስኪሩሉ
ብጣዕሳ ምሕራሩ።
ገለ ገጽ ፈገግ ኢሉ
ካብ በዳሊ መቕሉ
ተበዳሊ ምዃን
ንጽህና ኣምሒሩሉ
ሓቂ በሪሁሉ
ጸላም ውጊሑሉ፡
ክንርአአ ኢና ዓይኒ ንዓይኒ
ክወግሕ'ዩ መሬት በፍንጫ ብስኒ!
ኣማኑኤል ኢያሱ
07.10.05
UK
Sweden
Germany
Norway 
Italy 
Netherlands
Canada
Switzerland
Australia
France
Belgium
USA-EC
USA-Minnesota