Eritrean News - assenna

‘መንግስቲ ኤርትራ’ ከም ኣመሓዳሪ ኣብ ስልጣን ዘቐመጦ ይፍታሄ ዲመጥሮስ ዝተመርሖ፡ ኣባ ዶስቆሮስ ዝርከቦ ልኡኽ፡ ቅድሚ ሕጂ ውን ብመርበባት ዜና ኤርትራ ተዘአርጊሑ ከምዝነበረ፡ ድሕሪ ብዙሕ ተኣንጎት ተሸብሸብ ኣብ ወጻኢ ሃገራት ዝጀመሮ ዑደት፡ ብኤርትራውያንን ወጻእተኛታትን ድሕሪ ዘጋጠሞ ተቓውሞታት ከምዝፈሸለ ተፈሊጡ።

ብመሰረት ‘ቲ ዝተረኽበ ሓበሬታ፡ እቲ ጉጅለ ልኡኽ ብናይ ሮማ ካቶሊካዊት ቤተክርስትያን ተነጺጉ። ሓደ ምእንቲ ሃይማኖታዊ መሰላት ዝጣበቕ ኤርትራዊ ጉጅለ ኣብ ዝጸሓፎ ጸብጻብ ‘ውን፡ ፓትርያርክ ተዋህዶ ቤተክርስትያን ኣቦና ኣንጠንዮስ ተኣሲሮም ሃለዋቶም ድሕሪ ምጥፍኡ፡ እቲ ብመንግስቲ ተሓርዩም ዘይሕጋዊ ስልጣን ዝተቐበሉ ኣባ ድዮስቆሮስ ዝርከቡዎ ጉጅለ ልኡኽ፡ “ ምስ’ቶም ወግዓዊ መራሒ ኦርቶዶክሳዊት ቤተክርስትያን ዝኾኑ ፓትርያርክ ኣንጠንዮስ፡ ነዚ ትገብሩዎ ዘለኹም ምብጻሕ ብዝምልከት ኣቐዲምና ምልውዋጥ መልእኽቲ ስለዘይገበርና ክንቅበለኩም ኣይንኽእልን ኢና” ኢሎም ነጺጎሞም። 

ብዘይካዚ ብ 7 ታሕሳስ፡ እቲ ልኡኽ ኣብ ሚላን ኣብ እትርከብ ናይ ኦርቶዶክስ ቤተክርስትያን ቅድስተማርያም ምእታው ተኸልኪሉ። ኣብታ ቤተክርስትያን ዘገልግሉ ሰብ መዚ፡ እቲ ልኡኽ ንኦርቶዶክሳዊት ቤተክርስትያን ዝውክል ኣይኮነን ኢሎም ብምውጋዝ፡ ነቶም ኣብቲ ከባቢ ዝርከቡ ፖሊስ እቲ ልኡኽ ኣብ ማዕጾ ናይቲ ቤተክርስትያን ከይረግጽ ግቡእ ስጉምቲ ክወስዶ ሓቢሮም ኣባሪሮሞሞ። ይፍታሄን መሻርኽቱን ከኣ፡ ሰንበት ምድሪ ካብ ቤተክርስትያን ተሰጕጎም ምስ ደገፍቲ ህግደፍ ኣብ ክላእ ማንም ገዛ ኣራፊዶም።

ይኹን’በር መራኸቢ ብዙሃን ህግደፍ “ኣብ ሚላን ኣብ ዝገበሮ ምብጻሕ ፓትርያርክ ምዉቕ ኣቀባብላ ተገይሩሉ” እናበለ ከምኣመሉ ህዝቢ ከደናግር ቀንዩ።